Jer 46 | NdeIBE | STEP | Leli yilizwi likaJehova elafika kuJeremiya umphrofethi mayelana lezizwe.

Jeremiah 46

Ilizwi NgeGibhithe

1 Leli yilizwi likaJehova elafika kuJeremiya umphrofethi mayelana lezizwe.

2 Mayelana leGibhithe: Leli yilizwi elimayelana lebutho likaFaro Nekho inkosi yaseGibhithe, elanqotshwayo eKharikhemishi emfuleni iYufrathe nguNebhukhadinezari inkosi yaseBhabhiloni ngomnyaka wesine kaJehoyakhimi indodana kaJosiya inkosi yakoJuda:

3 “Lungisani amahawu enu, amakhulu lamancane, liphume liye empini.

4 Bophani amabhiza, gadani amabhiza! Manini ezindaweni zenu lilezingowane zenu! Lolani imikhonto yenu, gqokani izigqoko zenu zensimbi!

5 Kuyini engikubonayo? Bayesaba, bahlehlela emuva, amabutho abo ehlulwe. Abaleka ngesiqubu anganyemukuli emuva, njalo kulokwesaba izindawo zonke,” kutsho uJehova.

6 “Olejubane kasoze abaleke kumbe olamandla aphephe. Ngasenyakatho, emfuleni iYufrathe bayakhubeka bawe.

7 “Ngubani lo ophakama njengeNayili, njengemifula elamanzi agubhazelayo na?

8 IGibhithe liphakama njengeNayili, njengemifula elamanzi agubhazelayo. Lithi: ‘Ngizaphakama ngembese umhlaba; ngizachitha amadolobho labantu bawo.’

9 Hlaselani, lina mabhiza! Qhubekani ngentukuthelo, lina zinqola zempi! Yanini phambili, lina mabutho, madoda aseKhushi lawePhuthi, aphatha amahawu, madoda aseLidiya agoba idandili.

10 Kodwa usuku lolo ngolukaJehova, uJehova uSomandla – usuku lokuphindisela, olokuphindisela ezitheni zakhe. Inkemba izakudla ize isuthe, ize icitshe ukoma kwayo ngegazi. Ngoba uJehova, uJehova uSomandla uzanikela umhlatshelo elizweni lasenyakatho ngasemfuleni iYufrathe.

11 Yana eGileyadi uyethatha umuthi wokwelapha, wena Ntombi emsulwa Ndodakazi yaseGibhithe. Kodwa imithi uyandisela ize; akukho kusila kuwe.

12 Izizwe zizakuzwa ngehlazo lakho; ukukhala kwakho kuzagcwala umhlaba. Elinye ibutho lizakhubeka kwelinye; womabili azawela phansi ndawonye.”

13 Leli yilizwi uJehova alikhuluma kuJeremiya umphrofethi ngokuza kukaNebhukhadinezari inkosi yaseBhabhiloni ukuba ahlasele iGibhithe:

14 “Memezelani lokhu eGibhithe, likubike laseMigidoli; kumemezeleni njalo laseMemfisi laseThahiphanihesi lithi: ‘Manini ezindaweni zenu lilunge, ngoba inkemba idla abakhelene lani.’

15 Amabutho enu azabulawelwani na? Angeke ame, ngoba uJehova uzawalahlela phansi.

16 Azakhubeka kokuphela; azakuwa elekane. Azakuthi, ‘Vukani, kasibuyeleni emuva ebantwini bakithi lasemazweni akithi, kude kwenkemba yomncindezeli.’

17 Khonale bazamemeza bathi, ‘UFaro inkosi yaseGibhithe ungumsindo omkhulu nje kuphela; uselahlekelwe lithuba lakhe,’

18 “Ngeqiniso elinjengokuthi ngikhona,” kutsho uJehova obizo lakhe nguJehova uSomandla, “kuzafika omunye onjengoThabhori phakathi kwezintaba, njengoKharimeli ngasolwandle.

19 Lungisani izimpahla zekuthunjweni lina abahlala eGibhithe, ngoba iMemfisi izadilizwa ibe lunxiwa olungahlali muntu.

20 IGibhithe ilithokazi elihle, kodwa isibawu siyeza silisongela sivela enyakatho.

21 Amabutho okuqatshwa aphakathi kwalo anjengamathole anonisiweyo. Lawo azaphenduka abaleke endawonye, kawayikujama, ngoba usuku lomonakalo luyeza phezu kwabo, isikhathi sabo sokujeziswa.

22 IGibhithe izakhwaza njengenyoka ebalekayo lapho isitha sisondela ngobunengi baso; sizayihlasela ngamahloka okwabantu abagamula izihlahla.

23 Sizagamula amahlathi ayo,” kutsho uJehova, “lanxa eminyene kanjani. Sibanengi kulentethe, singeke sibalwe.

24 Indodakazi yaseGibhithe izayangiswa, inikelwe ebantwini basenyakatho.”

25 UJehova uSomandla, uNkulunkulu ka-Israyeli uthi: “Sekuseduze ukuba ngijezise u-Amoni unkulunkulu waseThebesi, loFaro, leGibhithe kanye labonkulunkulu balo lamakhosi alo, lalabo abathembe uFaro. 26 Ngizabanikela kulabo abafuna ukubabulala, kuNebhukhadinezari inkosi yaseBhabhiloni lezikhulu zakhe. Kodwa muva, iGibhithe lizahlalwa ngabantu futhi njengasezinsukwini zakudala,” kutsho uJehova.

27 “Ungesabi, wena Jakhobe nceku yami; ungathuthumeli, wena Israyeli. Impela ngizakukhulula endaweni ekude, lenzalo yakho elizweni lokuthunjwa kwayo. UJakhobe uzakuba lokuthula futhi kanye lokuvikeleka, njalo kakho ozamthuthumelisa.

28 Ungesabi, wena Jakhobe nceku yami, ngoba ngilawe,” kutsho uJehova. “Lanxa izizwe zonke engakuhlakazela kuzo ngizazichitha ngokupheleleyo, wena angiyikukuchitha ngokupheleleyo. Ngizakujezisa kodwa ngokufaneleyo kuphela; angiyikukuyekela nje ungajeziswanga.”